Arrikrutzeko koben egitasmoa 90.hamarkadan jaio zen, eta 2003ko abenduan hasi zen gauzatzen, jarraipen batzordeak argi berdea emandako urte berean. Haraino heltzeko bideak zabaltzen jardun dira bederatzi hilabeteotan eta, bideak irekita, kobazuloaren sarrera artifiziala egiteari ekingo diote 10-15 egun barru. Turismorako egokituko duten ibilbidetik gertu zonalde arkeologiko oso garrantzitsua dagoela kontuan izanik, aukera ezberdinak aztertu behar izan dituzte adituek, arkeologi gune hori ez kaltetzearren.
Kobazulora sartzeko tunela 12 metro luze da, eta zati bat, 8 metro ingurukoa, harkaitz barrutik joango da. Tunel hori igarota, 500 metroko luzera eta 50eko desnibela dituen ibilbidean murgilduko gara, aurkikuntza espeleologiko, arkeologiko eta mitologikoak ezagutzeko.
Teknologia berritzaileak
Argi jokoak, ahotsak eta irudiak erabiliz erakutsiko diete hori guztia bisitariei. Eta, horrez gain, ibilbide ondoko zonalde arkeologikoan, lehentxeago aipatutakoan, indusketak hasten dituztenean, lan horiek nola egiten dituzten ikusi ahal izango dute bisitariek; aurkitutako elementuek bisita bera aberastuko dute ondoren. Ikusi, ezagutu eta errespetatu izango da leloa, eta lurpeko ondarea ezagutzera ematea izango du helburu.
Proiektu osoaren aurrekontua bi milioi eta zazpiehun mila eurokoa da eta gauzak bide onetik badoaz, 2006 urteko udaberrirako bukatuta egongo da.