Atzo Duruko eguna ospatu zuten Oñatiko Aloña mendiko maldetan. Goizean hasi ziren ekitaldiak, eta egun osoan izan zen zer egin eta zer ikusi. Guztira 200 pertsona baino gehiago bildu ziren ospakizun honetan. Aierdiko txabolan egindako mezarekin eman zitzaion hasiera atzo Duruko egunari. Ondoren, Aierdiko aterpean salda eta txanpiñoiak dastatzeko aukera izan zuten guztiok.
Mezaren ondoren artzain txakurren erakustaldia izan zen. Bertan, bi parte-hartzaile izan ziren: Oñatiko Jose Luis Madinabeitia eta Mutrikutik etorritako Jabier Zubiaurre. Ordu berean Duruko artzainek egindako gazta dastatzeko aukera izan zen.
Marmitakoa eta pintxoak
Ohitura den bezala, txabola bakoitzak janaurrekoak eskaintzen ditu. Aurten, aldiz, antolatzaileek erabaki dute lau txaboletan ematea janaurrekoa eta urtetik urtera jakia eskaintzen duten txabolak txandakatzen joatea. Aurten, Bergarakue, Azkonazulueta, Bermejo eta Otadui txabolen txanda izan da. Janaurrekoa hartu ondoren guztiek batera bazkaldu zuten Aierdiko txabolan. Menua marmitakoa izan zen, eta guztira 200 pertsonatik gora elkartu ziren bertan. Bazkalostean, Urretxutik etorritako Zuzunegi anaiek trikitixarekin giroa alaitu zuten.
Iluntzera arte izan zen jaia Duruko Aierdiko txabolan. Giroa primerakoa izan zen egun osoan. Aurten, gainera, mendian eguna pasatzeko eguraldi aproposa egin duenez, inguruetako jende askok hartu du parte.