Etxerako Sistema Aurreratuak negozioa aurkeztu orain egin duten arren, 20 urte daramatza Fagorrek domotikaren alorrean lanean, izen handiekin lankidetzan gainera, Nokiarekin edo Philipsekin, esaterako. Bereizitako negozioa sortuta, ordea, teknologia berri honi bultzada eman nahi dio kooperatibak.
Oraingoz espainiar merkatura bideratuko du bere jarduna Fagorren negozio berriak, epe ertainera Europara eta Hego Amerikara zabaltzeko itxaropenez. Produktu berriak Fagorren etxetresnetan txertatuko dituzte, baina baita beste marka batzuetan ere.
Oraingoz, zazpi langile
Gaurko aurkezpen ekitaldian Oñatiko alkate Andoni Gartzia, MCCko presidente Jesus Catania eta Jose Ignacio Zuaire Eusko Jaurlaritzako Industria sailburuordea izan dira besteak beste. Zuairek zoriondu egin du Fagor «horrelako produktuak direlako Euskadik behar dituenak».
Hotza, Garbiketa, Ontzi-garbigailuak, Egosketa, Konforta, Etxetresna txikiak eta Sukaldeko altzariekin batera Fagor Etxetresna Elektrikoetako zortzigarren negozioa izango da Etxerako Sistema Aurreratuena. Oraingoz zazpi langile izango ditu, eta Oñatin egongo da kokatuta.