Iker Egañak beste pausu bat egin du prestatzaile fisiko ibilbidean. Eibarren egindako lan onak emaitza izan du eta datorren denboralditik aurrera Realean izango da oñatiarra. Klubeko behe-kategorietako prestatzaile fisikoa izango da Egaña.
97-98 denboraldian hasi zen Iker Egaña prestatzaile fisiko lanetan, Aloña Mendin. Sasoi amaieran Eibartik deitu zioten, bigarren taldearen prestatzaile izateko. Hiru urte egin zituen bigarren taldean, aurreneko biak Hirugarren Mailan eta azkena Bigarren B Mailan. Azken hiru urte hauetan, berriz, Eibarko lehenengo taldearekin, Bigarren Mailan aritu da Iker.
Amorrorturengandik gertu
Amorrortu buru azken denboraldian Eibarrek egindako lan onaren ondorioz zenbait klubek begitan hartu zuen bertako teknikari lantalde osoa. Guztiak batera talde handiago batera joatekotan izan ziren: Valladolida.
Realak Amorrortu fitxatu zuen, ordea; Eibarrek, berriz, Jose Luis Mendilibar hautatu zuen datorren denboraldirako entrenatzaile. Entrenatzaile berria bere prestatzaile fisikoarekin iritsi zen, eta Iker Egañari hauekin lehen taldean lanean jarraitzea eskaini bazioten ere oñatiarrak beste bide batetik jotzea erabaki zuen.
Bazirudien, Amorrorturen eta Iker Egañaren bideek bereiztu egin behar zutela, baina azkenean ez da horrela izango, ez behintzat erabat.