Aspaldiko ametsa betetzearen bidean dago Ganbara Abesbatza, disko honen grabaketarekin. Lehen zatia grabatuta dute dagoeneko, eta udazkenean ekingo diote berriro lan horri.
Hamar urte bete ditu talde gazte horrek, eta, diskoa grabatzeaz ez ezik, beste bi erronka izango ditu udazkenean: hain zuzen, Alacanteko Kantu Koral Sari Handia eta Firacor Sari Handia. Iaz irabazitako beste hainbeste sarik eman zioten Ganbarari lehiaketa hauetarako sarbidea.
Ibilbide arrakastatsua
Edozelan ere, hamar urteko ibilbidean, harro egoteko arrazoi asko dute Ganbarako kideek. Izan ere, sariak irabazi izan dituzte Estatuko txapelketa garrantzitsuetan. Era berean, errepertorio oso aberatsa dute, XVI. mendeko lanetatik hasi eta musika garaikideraino hartzen duena.