Atzo, astelehena, onartu zuen batzorde orokorrak Cegasako kapitalaren zabalkuntza, enpresak bazkide berria izan dezan. Operazioa aste honetan gauzatuko da.
Inbertsio fondoak 15 milioi euroko diruzaintza injekzioaren ekarpena egingo du. Diru ekarpen horrekin proiektu berriak garatuko ditu Cegasak, beti ere oraingo jardueretan oinarrituta. Oraingoz, behintzat, enpresak ez du beste eremuren bat jorratzeko asmorik.
Lau enpresak osatutako taldea
Taldea lau enpresak osatzen dute, baina guztien oinarria Cegasa da. Urte asko daramatza Cegasak pilak fabrikatzen eta jarduera hori dela medio egin da mundu guztian ezagun. Beste konpainia batzuetarako ere egiten ditu pilak.
"Cegasa Internacional" da bigarren enpresa eta pilak merkaturatzea da horren oinarrizko jarduera. "Energias Portatiles" da hirugarrena; pila elektriko bereziak ekoizten dituzte. Azkenik, "Cega Multidistribucion" garraioaren logistikari lotuta dago eta kontsumo handiko produktuak merkaturatzen ditu. Cegasako produktuez gain, beste konpainia batzuetakoak ere banatzen ditu.