Erretiratuaren Asterako egitarau sendoa antolatzen du urtero Pake Leku egoitzak, eta erretiratuen intereseko hainbat arlo lantzen ditu. Gaur, ariketa fisikoa landu dute, eta Kilometroen ibilaldia egin dute. San Martin inguruan otarteko janarekin bukatu da irteera. Bihar, eguena, 18:00etan, txokolate jana izango dute elkartean, eta etzi, egubakoitza, afari-merienda eta dantzaldia.
Domeka, omenaldi eguna
Zapatuan atseden hartuko dute erretiratuok, domekarako ekitaldi nagusirako indarberritzeko: izan ere, erretiratuei omenaldi eguna izango da. 12:30ean, meza izango dute parrokian; Oñatz taldeko dantzariek eta udal musika bandak emanaldia egingo dute; eta 14:00etan, elkarrekin bazkaldu eta dantzaldia egingo dute.
Pake Leku egoitzak urtero antolatzen du Erretiratuaren Astea, eta parte hartze polita izaten du. Gaur egun, 1.500 bazkide ditu egoitzak. Aurrera begira ere badituzte asmo gehiago: izan ere, Galiziara irteera antolatzen ari dira.