Giza tragedia
Joan den urtean Tindufeko iheslarien kanpalekuetan filmaturik, filmak Saharako maratoiaren bidez eta 55 minutuz giza tragedia handi bat azaltzen du: 250.000 sahararrek baino gehiagok 27 urte daramatzatela beren herrialdetik kanpo bizitzera behartuta; egoera lazgarrian, gainera.
Istorioak Abdullah aurkezten du, Saharako maratoian parte hartzeko gogoz prestatzen ari den gizona. Sasoi betean egon nahi du Tindufeko saharar iheslarien kanpalekuetan egingo den maratoirako; horregatik ateratzen da lasterka egitera lehen eguzki-izpiak lagun dituela. Jakin badaki sailkapenean goreneko postu bat lortzeak herritarrak asko poztuko dituela, ordu batzuetarako besterik ez bada ere.
Laguntza ugari jaso dute
Dokumental hori Irusoinek eta Moriartik ekoitzi dute, EiTBren laguntzarekin. Jaurlaritzaren Kanpo Ekintzetarako Sailak eta Donostiako eta Irungo udalek ere lagundu dute.
Finlandiako YLE telebista publikoak herrialde horretarako erosi ditu "Saharako maratoia"-ren gaineko emititze eskubideak, eta filma Kubako "Santiago Alvarez in memoriam" dokumental jaialdian parte hartzeko ere hautatu dute.