Irabaziak
2006an 624 milioi euroko salmentak izan zituzten taldea osatzen duten zazpi sail ezberdinek. Aurreko urtearekin alderatuz, %23ko igoera esan nahi du horrek. Aipatzekoak dira bereziki, Handling Systemsek izan zuen %41ko igora, eta baita Polimeroen %27koa.
Salmentak
Salmenten artean, nazioartekoek %26 egin zuten gora, denera 265 milioi eurotara helduz. 2006koa ekitaldi garrantzitsua izan da nazioartean zabaltzeko taldeak duen asmoetan: horren adibide dira, Ulma Construccionek Txinan erosi duen lantegia, baita Ulma Packagingek Errusia eta Polonian ireki dituen filialak ere.
Inbertsioak
Inbertsioei dagokienez, 141 milioikoak izan ziren iaz. Diru horrekin, besteak beste, bi egitasmo berri garatu ziren: batetik Legazpiko Precinox, eta bestetik, Ulma Forja bera hornitzeko proiektua, Oñatin duen lantegiaren hedapena ekarriko duena.
Lanpostuak
Lanpostuei dagokienez, 331 pertsona gehiago hasi zien 2006an Ulman lanean, orotara 3.513 izatera helduz:1.813 euskal Autonomi Erkidegokoak dira, 1.000 atzerrian eta 700 nazioartean. Langileen %80a gizonezkoak dira, eta %20a emakumezkoak, eta batezbesteko adina 37 urtekoa da.
Nazioarteko merkatua igotzea helburu
2007ra begira, urte haserako aurreikuspenen arabera, 717 milioiko salmentak lortzea espero du Ulma taldeak, nazioarteko merkatua izango litzatekelarik gehien igotzea espero duten esparrua. Inbertsioak, 190 milioi ingurukoak izango dira. Urteak daraman martxa ikusita, helburuak erraz beteko dituztela esan dute arduradunek.
Lanpostu berriak
Orotara, 2007-2010 urte tarteetan, 1.200 lanpostu berri eta 500 milioi euroko inbertsioak egitea da Ulmaren asmoa, 1.000 milioi euroko muga hausteko helburuarekin.
Instalazio berrien inaugurazioa
Emaitzen aurkezpena, Oñatiko Garagaltza auzoan Ulmak egin berri dituen instalazioetan egin zuten. Gaur, eguena, egingo dute egoitza berri horren inaugurazio ekitaldia, Juan Jose Ibarretxe lehendakaria bertan dela.