June Blazquez, Uxue Erdozia, Iñaki Larrañaga eta Uxue Zubia ikasleek, antzerki taldearen ibilbidea eta Oñatira ekarritako lana ezagutzeko, taldeko Intza Alkain eta Mikel Ibarguren elkarrizketatu zituzten, eskuko telefonoaren grabagailua erabilita. Antzerki konpainiak eguerdian Batxilergo mailako ikasleendako propio egindako emanaldia aprobetxatu zuten eurekin egoteko, eta, bide batez, eguenean eta egubakoitzean institutuan eskainiko duten tailerraz galdetzeko ere aprobetxatu zuten aukera hori.
Izar Azurmendik eta Martina Miguelek, berriz, DBHko ikasleendako prestatutako ginkanan jarri zuten arreta. Jolas horietako bat zen, adibidez, irakasleen txikitako argazkiak ezagutzea. Emotikonoen konbinazioak deszifratzea, esamesen eta siglen esanahia asmatzea, karaokean kantuen taldeak asmatzea eta kulturaren inguruko galdetegi bat erantzutea ere izan ziren pasa beharreko probak.