Liburu-dendetan Los niños macabros izenburuarekin aurki dezakegu. Tamalez, euskarazko bertsiorik ez dugu oraindik.
Estetikoki liburu polita da; formatu karratua dauka eta ilustrazio zuri-beltzek osatzen dute, garai bateko grabatuen estetikatik gertu. Halere, bereziki interesatu zaidana zera da, autoreak gaiari eman dion trataera. Liburuaren gai nagusia heriotza da (haurren heriotza, zehatzago esateko).
Liburuak 26 orrialde ditu (alfabetoaren hizkiak dira, hain zuzen). Orrialde bakoitzean haur baten heriotza azaltzen da esaldi labur batez adierazita. Haurraren izena alfabetoko hizkiarekin lotzen da beti. Horrela, 26 haurren heriotza dramatikoarekin egiten dugu topo.
Esanak esan, hainbat lekutan helduentzako liburua dela irakurri dut; eta gurasoei eta irakasleei ez omen zaiela larregi gustatzen liburu hori txikiekin lantzea, makabroegia delakoan. Haatik, haurrei ikaragarri gustatzen zaie!
Sarritan literatura zein ilustrazioa "infantilizatzeko" ohitura (txarra) izaten dugu. Baina, gehienetan, helduoi gustatzen zaizkigun irudiak eta istorioak dira, hain justu, haurrengan ere xarma, harridura eta lilura sortzen dutenak. Horregatik, kalitatezko lanen aurrean, haurren eta helduen artean funtsik gabeko bereizketak aplikatzea kasu askotan zentzugabea dela esango nuke.