Begiratu baino ez aurtengoetan zer ez den gertatu! Eta ez txantxetako kontuak: Israelek Palestinaren aurka burutu duen sarraskia, Herrikoen auzian kondena latza, bake plana motel, Ziburuko alkateak bertako ikastola itxi egin nahi du, abuztuan langabezia gehitu egin dela, Pujol inbertsioak dibertsifikatzen ari denon diruarekin, Gasteizen Marotok etorkinak kanpora bota nahi ditu, beste 28 gazteren aurkako epaiketa batez mehatxatu gaituzte, krisia frantziar gobernuan, Hollande jaunari Valls-a dantzatzea gustatzen omen zaio, Nazioarteko Diru Funtseko zuzendaria lapurretan, Zumarragako Arcelor-Mittal balantzaka, ebola indartzen ari Afrikako lau herrialdetan. Eguraldia bera ere ez da portatu udara osoan; tomaterik ez, atuna ere eskas eta hondamendi hau burutzeko Barcina berriro aurkezten dela hauteskundeetara!
Eskerrak baikor (hots, errealista) garen naturaz; izan ere, oraingoan UPNk ez du irabaziko, Eskozian eta Katalunyan independentistak nagusituko dira... Eta, gainera, gero eta gutxiago falta da hurrengo oporretarako.