Halaxe pasa ziren Euskal Herriko Itzuliko bigarren etapan ziklistak Untzillatik. Euria goian-behean, hiru lagun ihes eginda, eta tropela penitentzian, aurretik zituzten kilometroetan izan behar zuten egurrera begira indarrak gorde guran. Halako lasterketetan buila galanta egoten da, baina martitzenean bakarrik nintzen bide bazterrean; ehun lagun pedalei eragiten, eta euria lurra kolpatzen. Han ez zen besterik entzuten.
Ondoan izan nituen segundo gutxi haietan errespetatu beharreko isiltasuna zela iruditu zitzaidan, animo oihu txikienak ere euren momentuko bakea hautsiko zuelako, eta lasterketara itzuliko zituelako.