Desobedientzia baketsua. Hori da defentsa estrategia, denentzat. Zeharkako akordio zabalak blindatuta, antolaketa eta diziplina zorrotzak dira, Puigdemontetik hasi eta azken auzo taldera. Baina Graciako taberna batean emakume batek zera diosku urriaren 2ko bazkalorduan: "Horrela ari gara defendatzen, baina horrek ez du esan nahi bestela ez dakigunik".
Hamaika. Hamaika zartako, hamaika malko, hamaika erreakzio, hamaika harridura… Hamaikaren itzulpen numerikoa 155 izan daiteke.
Bortizkeria. Ez da egia "venga de donde venga" gaitzesten dela. Bagenekien, baina berriz ikusi dugu. Urkullu lehendakariak ohikoan baino gogorrago jardun zuen urriaren 1ean Espainiako polizien eta guardia zibilen eraso ikaragarri bortitzez, baina ez zen atera haren ahotik gaitzespenik. Katalunian EAJrekin minduta daude kolore askotako herritarrak.
Elkartasuna. Nola eskertzen duten euskal herritarren elkartasuna, eta milaka izan gara han. "Hurrengoak zuek zarete", esan digute sarri. Guri barregura ematen digu, ez dakite nola gauden. Kontua ez da inor gogogabetzea, baina errealitate printzipioa ere hor da.
Espainia inperiala. Piolin, "a por ellos", Rajoy, Espainiako Erregearen mezua, Generalitateko karguen atxiloketak, diru zigorrak… Bakarrik azken minutukoak aipatuta, 78ko espainiar demokrazia gazteari bere historiaren inperio usaina dario egunotan ere; Kataluniara, Asturiasera, Euskal Herrira, Marokora, Kubara, Filipinar irletara… "legearen inperioa" ezartzera bidalitako tropen usain bera.
