Elgetako zerbezari trago jo eta lehenengo akordeak entzun ditugu. Bide batez, ona zerbeza.
Gerturatu da lagun bat eta hasi gara hizketan: “Ona da gero e”. “Bai, igande arratsalde baterako plan bikaina.” “Pena betikoak gaudela… atzo ere Gasteizen hala izango zineten, ezta?…”. Laguna aurreneko ilarara joan da. Betikoak… ez du mespretxuzko tonuan esan, triste sumatu dut, ordea.
Guk argi daukagu pankartaren atzean 8.000 pertsona bildu ginen, hori “betikoak” baino gehiago izango da, edo? Ez, ez nion esan, lastima. Gazte batzuen ekimenak bildu zituen zazpi zutabe, eta zutabe bakoitzak aldarri bat, eta “betikoak” denean ez ziren izango, edo? Eta betikoak bagara, zer? Agian, betikoak gara igande arratsalde euritsu baten sofan Antena3ko filma ikusi nahi ez dugunok, edo gure munduaz beste… bat egin nahi dugunok.
