Herriko jaiak alde batera utzita eta hainbat eragile edo taldek bultzatuta antolatzen diren egitarauetatik aparte, 22 auzo-jai izango ditugu.
Gizartea gero eta indibidualistago bilakatzen doalarik, pozgarria da jaien bueltan horrenbeste gazte antolatzen ikustea. Norberak eta soilik norberak inporta duen garaiotan, besteei eskaintza kulturala, gastronomikoa, ludikoa… antolatzeko ardura eta lana egiteko prest. Gaur besteentzat, bihar gozatzeko aukera izatearen poztasunaz. Herrigintzako zutabe nagusia da jendarte antolatua interes kolektiboen alde lanean aritzea.
Jaietan ereiten den haziari esker, herrian ditugun hainbat talde zein elkarte elikatzen dira. Oñati dabilen herria izateko ezinbesteko diren horiek: Aloña Mendi, Hotz, bertso eskola, Torreauzo eta Aloñako Igoera moduko lasterketak, danborrada, film laburren rallya, mendi martxa, Ganbara eta Oñati abesbatzak, Antixena gaztetxea, Artixa, Sare Feminista, Caritas, jubilatu elkarteak, Inauterien lantaldea eta leku faltagatik sartzen ez diren beste hainbat. Bejondeizuela!