Frankismoaren amaierako haurtzaro osoa sexuen arabera bereizitako geletan igaro ondoren, Institutuko klase mistoen paradisua ezagutu nuen, eta, aldi berean, klase mistoen… infernua ere ezagutu nuen. Nahiko kalifikazio oneko ikaslea izan nintzen, baina bizitzako garai hartan hain garrantzitsuak ziren maitasun kontuetan kalabaza bilduma zabala lortu nuen –gai akademikoak baino askoz garrantzitsuagoak, jakina–.
Garai hartan Instituto Nacional de Enseñanza Media de Vergara –Ipintza izena ondoan zegoen baserriak zuen, besterik ez– izenez ezagutzen zenaren inaugurazioaren 50. urteurrena bete da, eta erakusketa bat ireki dute Aroztegi aretoan. Bertan, Santo Tomas de Akino-ren ospakizunak gogoratzean gozatu dut, batez ere. Ikuskizun baten, nire bizitzako lehen aldiko aurkezpenaren argazkia agertzen da… Maite Aristegi ospetsuarekin batera! Ezkontza dotore-dotore baten parodia ere ageri da, baina... ai! Gaur egun klasikoa den Grease musikal famatuaren egindako parodia ikusgarriaren argazkiren bat falta da.
Kasualitate ikaragarria da Toti Martinez de Lezearen Bretxa musikal berria Victoria Eugenia antzokian antzeztu aurretik 150 lagunek aurrestreinaldi bat egingo dugula antzerki-ikuskizun ahaztezinak –eta ezin hobeak– egiten genituen gimnasio berean. Poz handia izango da niretzat, eta, zalantzarik gabe, zoritxar txiki bat antzerki musikaleko konpainiako nire kideentzat, abuelo Cebolleta-ren –orduko tebeo-etako pertsonaia ospetsua– pasadizo batzuk entzutera behartuta baitaude, ezinbestean.
Erakusketa urriaren 23ra arte egongo da zabalik, eta, bide batez, zenbait irakurleri gogorarazi nahi diet urte gutxi barru Bachiller Unificado Polivalente (BUP) delakoa inauguratu zuen belaunaldiaren Insti maitean sartzeko urrezko ezteiak ospatu behar ditugula.
Zorionak erakusketa egileei eta eskerrik asko zuri-beltzeko anpliazio handiena on Imanol apaiza-argazkilariaren irudia aukeratzearren.
