Bere aitona, Telesforo Monzon Olaso (1826-1889), figura publiko handia izan zen eta Iparragirreren Gernikako arbola-ren lehen orkestra-interpretazioa zor diogu, berak antolatu baitzuen hura, 1853an, Madrilen, Zuzenbide Zibil eta Kanonikoko doktoregoa jasotzeko ekitaldian.
Olaso Dorreak XVIII. mendeko ilustratuekin duen harremana ere ezaguna da. Zalduntxoak eraikin horretan biltzen ziren Azkoititik Bergarara aldatu zirenean. Joseph Olaso –Telesfororen sei belaunaldi atzetik– Euskal Herriko Lagunen Elkarteko idazkaria izan zen, eta 1764an, Xabier Munibe Peñafloridako kondearen El borracho burlado operaren estreinaldian, zapatariaren papera egin zuen.
