Naizenarekin konektatzea. Hiperkonektibitateak deskonektatzen gaituen garaiotako kondena isil baina, aldi berean, zaratatsu honetatik ihes egin nahian nabil. Burutapen gehiegi ditut, bai; baina horiek gauzatzeko indarrik eta denborarik ez. Ni ere, inorekin parekatu nahi gabe eta nire neurrian, adiktu naizelako.
Askatzen naiz noiz edo noiz, kanpokoek berriz dar-dar egiten dutenera arte edo gaindosia iristen zaidanera arte, behintzat. Estimuluen esklabo naiz. Ez ditut nahi, baina nahi ditut. Kontzienteki naiz haien esklabo; beraz, adiktu. Gelako sabaiari begira egotearekin amesten dut, garai batean hain erraz ateratzen zitzaidan horrekin. Naizenetik izan nahi dudanera, harreman osasuntsuagoa eraikitzen saiatzen ari naiz.
Egoten ikasi nahi dut; besterik gabe, egoten. Ea, gutxinaka, deskonektatzen naizen. Ea nolanahiko estimuluen mendeko izateari uzten diodan. Nik izan nahi dut kontrola, ez kanpoko dar-dar anitzek. Edo nik ez badut, izan dezala, behintzat, motibo on batek.