Liburuen prezioa editoreak erabakitzen du eta, gutxi ezagutzen bada ere, prezio horren gorabeherak arautzen dituen lege bat dago. Lege horren arabera, ezin dira %5etik gorako deskontuak egin –%10era iritsi daitezke oso egun berezietan; adibidez, Liburuaren Egunean–. Hori dela eta, gehienez hemeretzi eurotan aurki dezakegu 20 euro balio duen liburu bat. Euro bat aurreztuko dugu, asko jota!
Hori jakinda, ez du ematen hainbeste merezi duela liburuak Interneten erostea, ezta? Gainera, liburu-saltzaileen ezagutzak eta aholkuak ezin dira alderatu web orri batekoekin. Beraz, liburu bat erosi behar duzuen hurrengoan, ez zalantzarik izan eta liburu-dendara joan!