Ateak zabaltzen gabiltza, beste ate batzuk betiko zarratu ahal izateko. Urteetan itxita izan diren ate ugari zabaltzeko bidea izan gara. Gutako bakoitza bere txikitasunetik, emaniko urrats txiki bakoitza bide egiteko bide izan delako.
Urruntze politika amaitzearekin batera, espetxe politikaren baitan aldaketak ematen ari bagara ere, behin eta berriz euskal presoek etxerako bidea itxita dutela salatzea dagokigu oraindik ordea. Fiskaltzak, Auzitegi Nazionalaren laguntzaz, legedia arruntaren ezarpenaren aurrean oztopoak jartzen jarraitzen baitu.
Salbuespenezko legediek eta salbuespenezko epaitegiek giltzarrapo izaten jarraitzen dute, baina bidean aurrera egiteko prest gaude. Urratsak ematen jarraitzeko unea da, konponbidearen eta benetako bake baten aldeko konpromisoa erakutsiz. Salbuespena lege den bitartean, oraindik, giltza ugari astindu behar ditugulako, hasitako pausuei jarraiki, atariraino bide egiteko unea da. Salbuespenaren giltzarrapoa irekitzeko unea da.
Atxabaltan, giltzak eskuetan, abenduaren 30ean, arratsaldeko 19:00tan farmazia zaharretik kalejira bat abiatuko da eta ondoren konponbidearen aldeko puzzlea denon artean osatuko dugu herriko plazan.
Abenduaren 31, 11:00tan Kurtzebarrin elkartuko gara argazkia ateratzeko eta 19:00tan plazan berriro elkartuko gara urtea agurtzeko.
Esperantza hitza gure elkarrizketara itzuli da, urte luzeetan giltzapean bahiturik egon ostean. Elkarlanean jarraituz gero, etxera bidea gertu egon litekeenaren itxaropena.
Jarrai dezagun ateak zabaltzen, salbuespenari ere zirrikitu oro zarratzeko.
Datozen egunetan ere milaka giltza izanen gara. Giltzak astinduko ditugu kaleetan, fabriketan, erakundetan... eta giltzen olatu bihurtuko dugu Bilbon urtarrilaren 13an.
Bidean aurrera goaz. Etorkizunaren atea zabaldu eta iragana zarratzeko giltzarria gara.
Lortuko dugu!
Gari Atxabaltara!
-----------
Txarli Garcia
Atxabaltako sarekidea
