Mirandek sekulako maila kulturala zuen eta euskal literaturari egin zion ekarpena itzela izan zen. Agian, euskal irakurleria kamutsegia zen halako idazle zorrotza onartzeko, eta gure kulturaren santutzarrengandik zentsura eta eraso gupidagabeak jasan zituen. Mitxelena, Saizarbitoria, Lete, Lafitte... ez dira oso ondo ateratzen Sotoren azterketan. Niretzat, saioaren kapitulu bikainena da Atxagak Miranderi buruz esandakoak desmuntatzen dituenekoa. Euskal inteligentsiak Miranderen kontra botatako zabor guztia garbitzea lortu du egileak.
Gure Jokin Zaitegik bestelako iritzia zeukan, ordea; harentzat Mirande laguna eta gizon ona zen. Zaitegiren eta Miranderen arteko harremanak ere aztertzeke daude oraindik. Ondo legoke, Sotok proposatzen duen moduan, Miranderen lan osoak publikatzea; eta, nire ustez, Arrasateko Udalak parte hartu beharko luke ekimen polit honetan. Jokin Zaitegi bekaren dirua horretara bideratu daiteke. Ea, ba!