Parrokiako Erdiko kaleko atean ia ahaztuta zegoen Errosario Ama Birjina txikiteroen babesle egitea erabaki zuten. Seriotasun guztiekin antolatu zuten: nobenarioa, eskapularioak, kofrade berrien izendapenak...
Eta fede zintzo honek Zeruko grazia jaso zuen ordainean: Kajoiko Mariak zurruteroen mesedetan Dragoimendiko alde zaharrean zabaldutako onurak ukaezinezkoak dira. Ikusgarria da Kajoikoaren eraginpean dagoen eremuan nola ugaritu diren edariaz lasai eta eroso gozatzeko espazioak: terrazak, toldoak, plaza publikoak ere zurrutegitu egin dira. Eta edariari eskainitako jarduerak ere ez dira gutxi: Mojitoaren Gaua Kubako Iraultza ospatzeko, Txakolin Eguna, ardo dastaketak… Kajoikoak babestutako eremuetan gauzatzen dira. Elikagai dendetan eta alderdi politikoen egoitzetan ere zurrutaren espazioa ez da txikia. Alde zaharra askoz alaiagoa da Kajoiko Ama Birjinari esker.
