Hainbat belaunalditan zehar, bai eskolan eta bai handik kanpo, buruan sartu digute taldean euskaraz ez dakien pertsona bat balego, errespetuagatik erdaraz egin behar dela. Euskaraz hitz egin ahal izateko, beti baimena eskatuz, beti beldurrez, zerbait txarra balitz bezala. Lantegian lana gaztelaniaz egin eta lankide arteko afari edo bazkariren bat egitean, orduan ere gaztelaniaz guztiek.
Euskaraz mintzatu nahi zuena beti arrotz.
Egoera hau aldatzeko lehen pausoak euskaraz eskolatutako gazteak komertzioetan eta beste edonon euskaraz lasai hitz egiten hasi zirenean eman ziren. Euskaraldiak ere ingurukoen ulermena eta prestutasuna adieraziz euskaraz egitera animatu du norbera.
Jokabide hau indartu eta orokortzeko bidean Batuz aldatu itunak abiatu duena euskaradunetatik haratago herritar guztientzako irekitako prozesua da, denek euskara jakin eta eroso erabiltzeko espazioak sortu, garatu eta elkarlotuko dituelako.
Atsegina izango da herritar guztiontzat elkarrekin eroso bizi ahal izatea.