Datorrenari begira jarrita, estrategiaz aldatzea erabaki dut: helburu eta desio potoloak alde batera utzi eta nimiñoetatik hasiko naiz etxea eraikitzen, ea horrela betetzeko errazagoak diren heinean zoriontasuna ere di-da batean datorren.
Zerrenda amaigabea denez, hona hemen lehenetsiko ditudanak: autoan noala mugikorra ez begiratzea, etxeko argi guztiak piztuta ez edukitzea beharrezkoa ez denean, garbigailuan sartu aurretik arropa guztiei buelta ematea, oporretan joaterakoan hortzetako eskuila eramatea, birziklatzeko txartel elektronikoa beti leku berean uztea, liburutegiko maileguak garaiz itzultzea, familiako guztien urtebetetze-egunak gogoratzea, noizean behin argazkiren bat inprimatzea…
Finean, irakurle maitea, gauza asko ditugu komunean.
