Joan den urtarrilaren 28an, istripua izan nuen Kurtzebarrira nindoala, basoan. Goizeko hamarretan, alanbrezko hesi batean kateatu, jausi eta pare bat metro amildu nintzen; gorputz osoan hainbat kolpe hartu nituen. Konortea ere galdu nuelakoan nago, ez naiz-eta hainbat gauzarekin gogoratzen.
Kontua da zorte handia izan nuela; izan ere, jende asko gerturatu zen laguntzeko. Mendizale ugari hasieran eta Gurutze Gorria, suhiltzaileak eta Ertzaintza ondoren. Anbulantzian eraman ninduten Txagorritxura. Eskerrak, bihotz-bihotzez, guztiei. Ez zaituztet denak ezagutzen, baina gustura elkartuko nintzateke zuekin ardotxo batera eta pintxo batzuetara gonbidatzeko. Taberna Berrin elkartuko gara hainbat oraingo zapatuan, 12:30ean. Etorri zu ere!
----------
Ramon Ramila
Arrasate