Nagusiak, edadetuak, zaharrak... Errealitate bera aipatzeko hitzak. Adin bat daukagunok ere erabiltzen da, baina ez al dauka adin bat jaio eta bizi den edonork?
Zaharra naizela esaten dudanean, zaharrak trapuak direla gehitzen didate. Hitz zatarra omen da, eta baita ekidin beharrekoa ere.
"Zaharra naiz" aitortzea norberaren bizitzaren bilakaera onartzeko eta bizitzeko falta zaigunaren kontzientzia hartzeko bidea iruditzen zait, batez ere gaztetasuna sakralizatu duen gizarte honetan. Zahar guztiak ezin dira zaku berean sartu. Ez da berdina zahartzaro osasuntsua, behar ditugun material laguntza eta konpainia izatea, ala gaixo, pobre eta bakardadean bizitzea. Inork ez du bigarren hau merezi, eta denoi dagokigu zaharren eskubideak aldarrikatzea eta ingurukoei laguntzea.
Guk, beraz, urriaren 1ean, martitzenean, topa egingo dugu daukagun adinera iristeko bizitzak eman digun aukera ospatzeko.
