Uda garaian, gure egunerokotasunetik irten, autoz ordu gutxi batzuk egin eta estatu barrenean herrira bidea egin ahal dugunok benetan zortea dugula esan dezakegu. Toki horiek landaguneak izan ohi dira, legerik gabekoak, eta helburua soilik disfrutatzea da.
Are gehiago, umeak herrira aitaita-amamekin uztaila pasatzera bidali ditzakegunok guraso pro bihurtzen gara. Haiek herrian disfrutatu eta guk, astean zehar, erdi-oporraldia bizi ahal izaten dugu. Hau da hau aitaita-amamek egiten duten gizarte lana! Bizitza osoan ez dugu denbora nahikorik izango eurei eskerrak eman ahal izateko.
Estrategia honetatik atera daitezkeen onurak, funtsean, hiru dira: umeak herriko jolasetan murgiltzen dira, ingurumenaz disfrutatuz eta entretenituz; aitaita-amamek euren bilobak inoiz baino gehiago aprobetxatzen dituzte; eta guk, gurasook, nolanahiko erdi-oporraldia bizitzen dugu.
Horregatik, udako herriak, nahiz eta gertu egon, familia osoarentzako benetako paradisuak direla esan dezakegu, uztailean denontzako uzta dira eta!