Gaur, Martxoak 21, Xenofobiaren eta Arrazakeriaren Aurkako Nazioarteko Eguna da. Espainiako Estatuaren eta EBren atzerritartasun legeak eta migrazio politikak salatu nahi ditugu
Gaur, Martxoak 21, Xenofobiaren eta Arrazakeriaren Aurkako Nazioarteko Eguna da. Espainiako Estatuaren eta EBren atzerritartasun legeak eta migrazio politikak salatu nahi ditugu. Arrazismo instituzionalaren eta euskal herritar batzuen eskubideen urraketaren adibide garbiena dira
Euskal bide bat aldarrikatzen dugu kultura-aniztasuna oinarri duen elkarbizitzarako, eskubide berdintasunerako eta pertsona guztien inklusio sozialerako; beti ere, Euskal Herriko berezitasun kulturalak, sozialak eta politikoak aintzat hartuta.
Arrazakeriaren, xenofobiaren edota bestelako diskriminazioen gorakadaren aurrean, kultura-aniztasunaren kudeaketa demokratikoa proposatzen dugu, elkarbizitza sustatzeko eta pertsona guztien eskubide guztiak bermatzeko.
Martxoak 21 honetan gogorarazi nahi dugu emakume migranteek hainbat diskriminazio jasaten dituztela, eta beharrezkoa dela ekimenak martxan jartzea horiek onartzeko, ikusarazteko, eta emakumeek autonomia lortu eta ahalduntzeko
Espainiako Konstituzioak eta atzerritartasun legeek boto eskubidea ukatzen dutenez, hainbat euskal herritarrek ez dute ez bozkatzeko ez bozkatuak izateko eskubiderik. Euskal Herrian bizi diren pertsona guztien herritartasun osoa exijitzen dugu, jatorri edota naziotasunen gainetik