EH Bilduren legez besteko proposamenari jarraituz, Legebiltzarrak Lan Ikuskaritza indartzeko eskatu dio gaur aho batez Jaurlaritzari, lan istripu kopurua altua murrizte aldera. Maider Otamendik arazo horren tamainaz ohartarazi du, eta azpimarratu du jatorrian langileek pairatzen duten prekarietatea dagoela. Hartara, ezinbestekotzat jo du prekarietatearekin amaitzeko neurri eraginkorrak hartzea, bistakoa delako orain arte hartutakoak ez direla aski izan, arazoak bere horretan jarraitzen duelako.
Horren haritik, EH Bilduko legebiltzarkidea pozik agertu da gaur norabide horretan erdietsitako akordioarekin, Jaurlaritzak Lan Ikuskaritzaren giza baliabideak eta baliabide materialak areagotu beharko dituelako. Zehazki, lan arriskuen prebentzioan lan egiten duten ikuskatzaileen kopurua handitu beharko du, lehentasun osoz bete beharko du transferituta dauden ikuskatzaile-postu guztiak eta beharrezkoak diren postu berri sortu beharko ditu.
Halaber, EH Bilduk sustatutako akordioaren arabera, Gizarte Segurantzaren erregimen ekonomikoaren kudeaketaren transferentzia, Lan Ikuskaritza osoa barne, Gobernu espainolari eskatzeaz gain, Legebiltzarrak Lakuari galdegin dio, batetik, bermatu dezala Administrazio Publikoarentzat lan egiten duten enpresek lan arloko legeria zorrotz betetzen dutela eta, bestetik, arrisku-ebaluazioen eta prebentzio plangintzen gaineko kontrol zehatz-zehatza egin dezala Gobernuak.
