Hala, 2013an edo aurretik jaiotakoek nagusien txapelketan jokatuko dutela adierazi dute antolatzaileek. Partaide bakoitzak 15 euro ordaindu beharko du, kamiseta opari –soilik kamiseta erosteko aukera ere badago–.
Herritarren artean babes zabala duen ekitaldia da Atzeko txapelketa. Iaz, esaterako, 80 lagunek hartu zuten parte. Olalde pilota elkartetik aurreratu dute nagusietan apuntatzen diren lehen 68ak zuzenean sartuko direla txapelketara, eta ondorengoek aurre-kanporaketa jokatuko dutela. Pilotarien artean hiruko taldeak egitea da asmoa, eta irabazleak kanporaketetara sailkatuko dira. Neurketak 10 tantora jokatuko dira; finalerdiak eta finala, berriz, 8 tantoko bi jokotara –berdinketarekin, 4 tantoko beste joko bat–. Partaideek epaile lanak ere egin beharko dituzte.
