UDA futbol taldea Hirugarren Mailara igotzeko borrokan izan da denboraldi osoan zehar, eta herritarrek ez dute hutsik egin. Egungo mundu globalizatuan, futbol herrikoiaren garra itzaltzen ari da; ez da aretxabaletarren kasua.
Futbolaren baitan komunitate bat sortzeak kultura, adin, sexu eta sinesmen desberdineko pertsonak helburu komun baten inguruan batzeko aparteko gaitasuna du. Gizartea kohesionatzeko tresna, oro har. Herriaren opioa izatetik urrun, zaleen artean nortasun kolektiboaren zentzua indartzen lagundu eta jendea mobilizatzen du. Futbolaz gozatzeko guztiak dira ongietorriak. Horrek urrea balio du.
Real Madril eta Bartzelonaren munstroak herriko futbola irensten duen bitartean, mantendu dezagun garra bizirik. Denontzat irisgarria izango den kirolaren alde, jarraitu herriko taldea animatzen!