Whatsappeko mezuak ugaritzea, agendak betetzea; lagunekin ordu luzez egoteko premia hori. Aldartea hobetzea; baina, egunaren buruz eta nekearen ondorioz, aldartea okertzea; astegun barruan terraza giroa dastatzea; kafea izotzarekin eskatzen hastea, egarritzea; sugandilak bezala eguzki izpiekin hanketako behatzak urratu arte ibiltzea.
Armairu aldaketa egitea, arroparekin ez asmatzea; badaezpada, txaketa goxoak mantentzea, sandaliak janztea, hotz pasatzea; orain arte gutxi bistaratu dituzun gorputz atalak bistaratzea; eguzkitako betaurrekoak garbitzea, polenaren erruz mukizapiak ondoan izan beharra.
Kotxea bero topatzea, kotxeko maleteroa zikintzea, bizikleta garbitzea; kostaldera gustura alde egitea, edota mendira; lehen izozki goxoa emeki miazkatzea; mila plan zoro eta xelebre egiteko gogoa piztea; plan sinpleenekin gehien disfrutatzea; larunbatak jendartean egoteko gogoa; igandeetan isilune eta gerizpeko loaldi goxo baten gosea; astelehenak gozoago sentitzen hastea.
Eguraldiari begira egotea, ortua ureztatzea, uzta jasotzeko desiratzen egotea. Udako ekaitzak ezustean harrapatzea; gustura bustitzea, euriaren usain hori gogoratzea. Eguzkipean lan egiten dutenen erruki izatea. Gazteari eguna motz gelditzea; nagusiari luze.
Kontzertuak, musika, liburuak, bazkariak, afariak, denbora aprobetxatzea, denbora galtzea, amets egitea, ametsak betetzea… Maiatzeko eta ekaineko giro gozoa; uda aldera naroa.