Udazkenekoak

Erabiltzailearen aurpegia Malen Ugarte Irizar 2021ko aza. 6a, 00:00

Aurreko urteko idatzian legez, berez, hasi nahi nuen esaten udazkena nire sasoirik gustukoena dela, alergia guztiak haizeak eramaten dizkidala, eta aurpegian gorriune lehorrak agertzen zaizkidan arren, niretzat urtaro sasoitsu zein zoriontsuena dela. Aurtengoa, baina, ezberdina egiten ari zait, urtaro malenkoniatsuena gutxi ez, eta badirudi oraintxe harrapatu nauela pandemia ondorengo ajeak.

Pandemiak 27 bat urterekin harrapatu gintuen, eta ez dakit ondo hogeita hamar urteko krisiagatik edo, baina badaukat sentsazioa lagun kuadrilla zeharo nahastu zaigula. Ia konturatu ere egin gabe iritsi gara 30 urteren bueltara, bakoitza bere beldur eta bizitza asmo ezberdinekin. Hori gutxi ez eta, ia guztiok herritik kanpo harrapatu gaitu bizitzak, bakoitza bere gorabeherekin. Agian, iritsiko dira sasoi hobeak, kalitate handiagoko patxada uneak, gure artean batzeak horrenbesteko ahaleginik suposatzen ez duten momentuak. Ahalegina diot, positiboki, ahalegin moduan ikusten baititut harremanak. Iritsi da momentu bat non ez dakigun zein ikerketa burutzen ari den bata, zein kezka dituen besteak, zein afiziotan dabilen gustura aspaldi ikusi ez duguna. Ezer berezirik gertatu ez dela dirudien arren, zerbait aldatu zaigu, aldatu da zerbait.

Bene-benetan, eta esatea – zein idaztea– apur bat kosta egiten zaidan arren, udazken honetan hasi nahi nuen esaten betiko lagunen falta sumatzen dudala azkenaldian. Esan eta kontatu nahi diet, zutabe hau askok irakurriko ez duten arren, nola sentitzen naizen, eta entzun nahi ditut esaten beraiek egiazki nola dauden. Hala ere, badakit urrun sentitu arren, behar dudanean zainduko –eta zaintzen– garela. Asteburu hauetako batean, antolatu beharko dugu zerbait eguzkiaren goxotan barruak epeltzeko...

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak