Istorioaren garaitik 33 urte pasa dira, eta Ingalaterran ez dakit, baina gure herrialdean horrelako arazoek gaur egun jarraitzen dute. Eskolan, nesken egoerak aurrerapauso anitzak eman ditu.
Tamalez, mutikoen artean gauzak ez dira horrenbeste aldatu. Kirola egiten ez dutenak seinalatuta daude. Antzerkia, dantza, musika… gustuko dutenak mutil kuadrillatik baztertuak izaten dira. Askotan, onartuak izateko, saiatzen dira besteekin batera kirolean, baina, gehienetan, saiakerek frustrazioa sorrarazten diete. Beste askotan, mutikoek benetako zaletasunak ezkutatzen dituzte onarpena bilatzeko. Hori dela eta, mutiko batzuentzat, haurtzaroa sufrimenduz bizitako etapa bihurtzen da.
Zorionez, gehienetan, familien laguntasun eta babesari esker etapa hori gainditzen dute eta indartuta irten, nortasun berezia izaten baitute heldutasunean. Tamalez, beste batzuetan, laguntza ez da nahiko izaten; frustrazioa luzarorako izan daiteke. Berdintasunaren aldarrikapenaren garaian, gai honek ere arreta merezi du.
