Lope Alberdi organoaren lehen notak. Denok isilik, musikan murgilduta. Oscar Candendo maisuaren ferekaz sorturiko soinuez gozatzen.
Entzuten nagoen esaldi bakoitzak, fraseo bakoitzak, pentsarazten dit bergararrok pribilegiatuak garela.
Bergarara etortzen ari diren punta-puntako artista profesionalek euren lana eta jakituria gure herriari eskaintzen diote, gure altxor artistiko-kultural-musikala betiko mututu ez dadin; San Pedro parrokiako Stoltz-Frères organoa harro sentitzeko moduko ondarea delako, eta zuhur zaindu beharrekoa.
Munduko toki ezberdinetatik etorritako organista guztiak bat datoz: gure Stoltzaren soinua zoragarria da, berezia.
Munduan, gainera, ezaugarri horietako instrumentu oso gutxi geratzen dira; lagun baten hitzetan, organoen arteko Ferraria da.
Eta bitartean kontzertua aurrera doa, amaitzear dago.
Bukaeran, elkartutako ehun entzuleok, liluratuta, hunkituta, eskertuta, txalo-zaparrada eskaintzen diogu Antzuolan jaiotako artista handiari.
Hausnarketa: Bergarako musikariak ari dira, kanpotik ere lehen mailako profesionalak musu-truk datoz laguntzera.
Jabetuko al gara herrian ditugun altxorrez, eskura ditugun aukerez, balioez?
