Zeruan herensugeak zeudenekoaz

Erabiltzailearen aurpegia Marixe Ruiz de Austri 2021ko ira. 3a, 00:00

Azken egunetan bidaia luze samarrak egin ditut autobusean, eta zalantza bat argitu ezinik nabil. Dadaismotik hiperrealismora egin nuen jauzi inkontzientea noiz izan zen asmatu ezinik. Ez dut oroitzen zein izan zen hodeien formekin ipuinak sortu nituen azken bidaia luzea. Ezta ere noiz izan zen makila bat Erdi Aroko zaldunek zerabilten ezpata luzea bailitzan astindu nuen eguna.

Ez dut gogoan noiz izan zen hiru hirukien etxean Ane, Elene eta Tereseri kozinatu, mahaiaren bueltan eseri eta sorginaren inguruko txutxu-mutxuak entzun nizkien azken aldia. Ezin akordatu ahizparekin autoan antzeztutako pertsonaien izenak, ezta irudikatzen genituen eszenatoki eta jantziak, hamabi orduko bidaia ere motz bilakatzeraino taxutzen genituen elkarrizketa arin amaigabeak.

Azken eguna oroitu baino gehiago, gustatuko litzaidake irudimen inozente eta goxo horren besoetan berriz kulunkatzea noizean behin. Nahiago dut, sikiera, mentalki hegan egindako azken eguna iraganean baino gehiago, etorkizunean kokatzea.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak