Ordutik, hamaika iritzi entzun behar izan ditugu, zilegiak guztiak. Hala eta guztiz ere, usteak uste eta iritziak iritzi, denborak agerian utzi du plan horren benetako eraginkortasuna. Izan ere, oraindik arazoak dirauen arren, tarteka gure autoak uzteko lekuren bat aurki daiteke herrian.
Baina arauarekiko nire adostasuna ez dagokio noizbehinka leku bat aurkitzeko zortea izateari, arazoa autoarekiko dugun mendekotasuna baita eta ez aparkaleku falta. Aparkaleku gehiago egiteak arazoa areagotu besterik ez luke egingo eta aldaketa bergararrongan dagoela pentsatzen hasi beharko genukeela uste dut.
Hau da, behar ez diren autoaren erabilpenak murriztuko bagenitu, ez litzateke aparkaleku gehiagoren beharrik izango eta egungo arazoa konponduko litzateke. Baina horrek bergararron partetik esfortzu txiki bat eskatzen du... eta TAOk ahalegin hori egitera bultzatzen gaituela deritzot.
Horregatik, alaitasunez hartu dut TAO beste hiru kaletan zabalduko delako berria; mesede egingo baitio bai aparkatzerakoan dagoen arazoari eta baita oinez ibiltzera animatuko diren horien osasunari ere.
