Irudi eta testu bidez, Australiara emigratu zuten gizonen eta emakumeen bizipenak irudikatzen dira.
Bidaia itsasontziz egiten zen. Normalean, Italiatik, hilabete baino gehiagoz. 1958-1960 artean bost irteera/ operazio nagusi antolatu ziren Euskal Herritik: Kanguro, Eukaliptus, Emu, Karry eta Dorreak. Operazio haiek, batik bat, Australiako gobernuaren eskulan beharra asetzea zuten helburu. Lehenengo bi operazioetan 160 gizon inguru joan ziren bidaia bakoitzean. Hirugarrenean, Monte Udala ontziak laurehun pertsona baino gehiago eraman zituen; tartean, 55 bikote, 77 haur eta 214 mutil gazte. Gehienak bizkaitarrak ziren; gainerakoak, nafarrak eta gipuzkoarrak. Emakumeek ere emigratu zuten; askok Australiako eta Espainiako gobernuen arteko Marta migrazio-akordioaren bitartez.
Batez ere, kanaberak mozten aritu ziren, matxetearekin, bero kiskalgarripean, eltxo, melaza eta izerdi artean. Dena eskuz. Gogorra zen lana.
Migrazio fenomenoetan ohikoa den bezala, euskaldunak beraien artean harremantzen ziren, nagusiki. Aisialdian sortutako harremanei esker, hainbat euskal etxe sortu zituzten. Horri guztiorri esker mantendu dituzte, hein batean, euskara eta euskal kultura.
Erakusketa horrek, dena den, ez du soilik Australiako diasporara gerturatzeko balio. Migrazio fenomenoak aztertzeko aukera ematen du, eta erakusten digu ohikoak diren patroiak –adibidez, euskaldunen kasua– beste komunitate eta pertsona batzuen esperientzietan ere errepikatzen direla. Gaur egun Euskal Herrira etortzen diren pertsonekin ere horrela da. Honek ulertarazi beharko liguke, azken finean, jatorria edozein izanda ere, ez garela (horren) desberdinak.
