Uste dut ez dela beharrezkoa gogora ekartzea enpresaren misioa, oro har, eta euskal enpresarena, zehazki, herriarentzat, familientzat eta herritarrentzat, lanpostuak eta aberastasuna sorraraztea dela; baina, hori gerta dadin, beharrezkoa da enpresak izatea ekonomian trakzio lana egingo dutenak.
Hau horrela, ez da komeni gure enpresek lehiakortasuna galtzerik; hemengo enpresak indartu daitezela berriro, oinarrizkoenak barne. Krisia pasa dela uste izatea ezjakintasunak eragindako akatsa dela uste dut; enpresak mota guztietako zailtasunak ari dira bizi izaten, egoera berrietara ahal duten bezala ari dira egokitzen, eta laguntza behar dute. Horren erakusle da egunotan ezagutu dugun esportazioen beherakada; arrazoiak denok ezagutzen ditugu. Aldaketa handiak dira gertatzear; hobe esan, gertatzen ari dira; honen aurrean, enpresak laguntza behar du: berrikuntza, formazioa, teknologia eta inbertsioa. Ez dago beste biderik, ez da presio fiskal handiagorako unea.
