Ikusteko dago, halaber, behin osasun fisikoa parametro ohikoetara errenditzen dugunean, zer-nolako eraginak antzematen diren beste osasunetan, mentalean eta sozialean.
Pandemiak bakartu egin gaitu, beldurtu, ahulago sentiarazi. Pertsona sendoak izateko bidean atzerapausoa izan da. Bakoitzak bere baitan eta hurbilenekoekin egin beharko dugu gure emozioen analisia eta kalteak gainditzeko ariketa. Umetu egin gara, aginduak goitik eta halabeharrez jasotzen eman dugu denbora luzea eta gihar soziala atrofiatu egin zaigu. Ahaztu egin dugu arazo kolektiboak ere baditugula, eta horien alde elkarrekin egin behar dugula, berriro kalean eta plazetan.
Lesio luzea izandako kirolarien antzera, entrenatzen hasi beharrean gaude, poliki eta etengabe, taldean elkar animatuz, berriro indarra hartuko dugun konfiantzarekin. Berriro pertsona sendo eta sozialak izan arte; eta, ahal bada, lehen ginena baino areago.
