Izan ere, 40 urteotan gauza asko eta oso azkar aldatu dira gure gizartearen baitan, eta dinamika sozialetan eragin nahi duenak oso ondo aztertu behar ditu aldaketa horiek, bere ekimenak, diskurtsoak eta antolamenduak ahalik eta eraginkorren izan daitezen. Irudipena daukat, oro har, azterketa zorrotza izaten ari dela eta ondo identifikatu direla jorratu beharreko ildo estrategikoak: ahalduntzea, aktibazioa, antolamendua, sozioekonomia, aisialdia... Horrez gain, Arrasaten eta Debagoienean oso errotua dago lankidetza publiko soziala, gizartearen ekimena eta erakundeen ahalmena uztartzen dituena, herri garapenaren mesedetan.
AEDren eredua oso zabaldua dago Euskal Herrian zehar, eta badaude dinamikak euskaltzaleen adimen kolektiboa eta berrikuntza eraikitzeko. Prozesu horretan, ziur nago, berriro eraginkorra izango da Arrasaten burutzen ari den gogoeta.