Oihartzun handia izan du kale istiluen kontuak, bereziki Espainian egin den erabilera lotsagarriaren eraginez. Bideoetan ikusi dugunaren kontra, independentismoaren izaera biolentoa saldu digute, estatuaren indarkeria legitimatzeko.
Baina istilu horiek badute irakurketa interesgarria katalanen aldetik. Lehenik, ez dira erori gaitzespenaren logika maltzurrean. Desobedientzia baketsuaren bideari eusten diote, eta hartara itzultzen ari dira azken egunotan. Bigarren: neurri handian mugimenduaren kanpotik eragindako istilu artean, belaunaldi oso gazte bat bildu zaie orain arte helduek gidatu duten borrokara. Gazte horiek irmotasuna eta eraginkortasuna erantsi diote borrokari. Eta azkenik, politikarien alderdikeriak eragindako kontraesanei herri dinamika gailendu zaie berriro, mugimenduaren garai onenetan bezala.
Katalunia erne ikusten dut, haserrea indar eragile bihurtu eta beste txanpa bati ekiteko prest. Euskaldunon etorkizuna ere jokatzen ari den partida honetan, elkarlanean jardutea dagokigu.
