Horrela jokatuta, gogaitu egiten gaituzte eta tentazioa pizten zaigu politikariak eta politika arbuiatzeko. Nire akorduan herritarren estimaziorik baxuena du gaur politikak. Eta nago, hain zuzen, horixe nahi dutela politikari berriek; alegia, politika edukiz hustea, azalkeria hutsean geratzea, eta herritarrok gero eta interes gutxiago izatea gai politikoetan parte hartzeko.
Baina ezin dugu tranpan erori, politika herritarron tresna bakarra da interes komuna defendatzeko; politikaren bertsorik garatuena den demokrazia behar dugu gizartearen indarra artikulatzeko eta metatzeko, boteretsuen indarra orekatzeko. Politikaren erabilera makurrak ez gaitzala gu politikatik aldendu.
