Organoaren zaharberritze lanak azaldu zizkiguten, baita hainbat kuriositate eta istorio polit ere. Gero, elizatik mugitu gabe, erretaula errenazentista, Hilzoriko Kristoa, Jusepe de Riberarena izan litekeen koadroa, sakristian dagoen taula flandriarra... Denak ikusi genituen. Bisita bukatu eta gero, kalera irten ginenean, Santa Marina eliza eta herrian denok ezagutzen ditugun hainbat etxe, dorre eta palazio etorri zitzaizkidan burura. Ezagutu? Ez dakit.
Harro sentitu nintzen herrian dugun ondareaz. Baina ez hainbeste horiez guztiez dudan, edo baita dugun?, ezagutzagatik. Bergarar gehienok bezala, esango nuke. Gauza inportantea da norberaren ondarea ezagutzea. Baditugu horretarako hainbat aukera, bisita gidatu eta abar. Aprobetxatzea besterik ez zaigu falta. Noiz edo noiz, uda partean, ikusten ditugu turista taldeak bisita gidatuak egiten gure herrian. Baina gauza izango ginateke gu geu gidari aritzeko gure kanpoko lagunek bisitan etortzen zaizkigunean?
