Apur bat. Hirugarren adina esaten zaio baita. Baina gure bizitzako garaietako bat da. Ez dator ezustean. Denboraren poderioz baizik, ezinbestekoan. Gaztetan urrun ikusten genuena gero eta gertuago dago. Beste gauza bat da noiz onartzen edo sentitzen dugun zaharrak garela. Pasa den eguaztenean, Goienagusik antolatuta, hitzaldia izan zen Seminarixoan, hamabostean behin bezala. Goienagusi Debagoienean jarduten duen kultura elkartea da. Bazkideen batez besteko adina 70 urtekoa da; horietatik, 42 bergararrak. Hainbat jarduera antolatzen ditu urte osoan bailarako herrietan –astero bi hitzaldi, bisitak eta mendi irteerak hilero, irteera kulturalak, ikastaroak...–. Bere xedea: zahartze prozesu hobea eta luzeagoa izatea. Bergaran bada San Joxepe ere, erretiratuen elkartea, 1.700 bazkide baino gehiago dituena. Aukera zabala eskaintzen du: ikastaroak, tailerrak, bidaiak, Kulturaldia. Badu bere abesbatza baita. Hau ere bada zaintza.
Goienagusi eta San Joxepe moduko elkarteak dauden bitartean, zaintzen gaituztenak, ongi etorri, zahartzaroa.