Emilia Perez filmagatik, emakumezko aktore nagusi saria trans emakumezko batek jaso dezake historian lehen aldiz, eta, Gasconek berak onartuta, izendapenak mundu osotik etorritako zorion mezu oldea ekarri zion.
Sarietarako promozio betean, baina, lore aparretan zela, Gasconen hautagaitzak kolpe gogorra jaso du asteon. Bere sare sozialetako iraganean begiratuta, musulmanen kontrako mezuak eta poliziak hildako George Floyd-en aurkakoak azaleratu dira, ordura arteko laudorioak gaitzespen ozpindu bihurtuta. "Txio hauek ilusio handia pizten zuten izendapena zikindu dute", esan du Ernest Urtasun Kultura ministroak, aingerua deabru bihurtuta.
Ez dakit, ba, aitona falangista zuen politikariak besteen iraganean arakatzeko zein zilegitasun izan dezakeen, baina badirudi moralkeria eta hipokrisia erakustaldi hauek, beste behin, eskuin muturrarentzat gasolina izango direla. Gasconek barkamena eskatu du, bai, baina berandu, ez baitu Oscarrik irabaziko.
