Asteburuan, Yevgeny Prigozhin buru duen Wagner taldeak kolpe saiakera eman zuen errusiar armadako buruzagien kontra. Tankeak hartuta, milaka mertzenariok Rostovetik Moskurako bidea hartu zuten, errusiar aire armadaren bonbek eta Lukaxenko bielorrusiar presidentearen bitartekaritzak kolpea eten zuten arte. Errusia aldean mertzenarioak asaldatuta dabiltzan honetan, gurean titular hau irakur zitekeen aste hasieran: Bi mila ertzainek lehendakaritzako bidea egin dute lan eskaeren alde. Wagner-eko mutilek bezala, gure poliziek ere agintariengana jo dute zuzenean, lan baldintzekin nazkatuta daudela adieraztera.
Jusapol polizia-sindikatuaren bidetik, Ertzainas en Lucha deritzon mugimenduari kirats erreakzionarioa dario. Indar asindikaladirela diote, baina bada asindikal edo apolitiko baino adiera kontserbadoreagorik? Badirudi, ertzainen greba mehatxua gaindituta, Tourra normaltasunez irtengo dela bihar Bilbotik. Jaurlaritzak, baina, adi jarraitu beharko du. Gaitza Ertzaintzaren erroetaraino sartuta dago eta aferak luze joko du, dudarik ez izan.
