Donostiako protokoloa

Erabiltzailearen aurpegia

Urtea amaitzen ari zaigu, Gabonak ere iritsi zaizkigu eta horrelakoetan balantze txikiak edo handiak egiteko garaia iristen da.

Eta 2016a gurera ekarri duen berezitasunetako bat da Donostiak Europako Kulturaren Hiriburu izendapena jaso izana. Hiriburu izendapen horren barruan antolatutako ekimenak era askotakoak izan dira. Azpimarratzekoa pasa den larunbatean Kursaalean aurkeztu zen Hizkuntza Eskubideak Bermatzeko Protokoloa. Ziur nago aurrerantzean Donostiako protokoloa munduan zehar entzuten denean hizkuntza eskubideekin lotuko dela.

Antzerako zerbait gertatzen zaigu Kiotoko protokoloa entzuten dugunean. Kioto eta protokoloa hitzak elkarren ondoan entzuten ditugunean ingurumenarekin lotzen dugu. Donostiako protokoloak hizkuntza gutxituen eskubideak bermatzeko tresna ezin hobea eskaintzen du. Hori bai, tresna eskaini arren, hizkuntza eskubideak bermatu ahal izateko baliabideak, ekimena, nahia, errespetua, interesa… beharko dira, bestela, paper hutsean gera daiteke protokolo hori eta ez luke ezertarako balioko. A! eta Gabon zoriontsuak guztiontzat.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira.

TELEGRAM: Batu zaitez @GoienaAlbisteak kanalera.