Nire ahizpa Maria Jesusek hogei urte zituen, eta nik hemeretzi. Han ekin genion gure ibilbideari, ilusioz, kemenez eta atrebentzia apur batez. Izan ere, garbi esanda, ezjakintasuna ere ausarta da batzuetan. Aurtengo abuztuan, 2017an, berrogei urte beteko dira Etxaluzeko Urrutia Emakumeak denda ireki genuela, eta tarte horretan oñatiarren laguntza izaten jarraitu dugu.
Alabaina, orduan hasitako lanari orain amaiera iritsi zaiola esan behar dizuet penaz. Hori dela eta, herritar guztioi eskerrak eman gura dizkizuet luzaroan erakutsi diguzuen konfiantzarengatik, zuek gabe gure dendak ez baitzuen hainbeste denboran irauterik izango. Eta, jakina, mila eta mila esker urte hauetan guztietan lankide izan ditugun gure neskei.
Bihotz-bihotzez, eskerrik asko denoi!
----------
Mari Carmen Urrutia
Oñati
